गृहमन्त्री सुधन गुरुङ एक्सनमा, प्रहरी संगठनलाई चुस्त-दुरुस्त बनाउन देश दौडाहामा

समाचार :
काठमाडौं, असार २० – गृहमन्त्री सुधन गुरुङ पछिल्लो समय सुरक्षा संयन्त्रलाई प्रभावकारी, चुस्त तथा जनउत्तरदायी बनाउन देशका विभिन्न जिल्ला र सीमा नाकाहरूमा आकस्मिक अनुगमनमा निस्किएका छन्।
अवैध तस्करी नियन्त्रण, सीमा सुरक्षाको अवस्था तथा प्रहरी प्रशासनको कार्यसम्पादनको प्रत्यक्ष मूल्याङ्कन गर्ने उद्देश्यले गृहमन्त्री गुरुङले पूर्वदेखि पश्चिमसम्मका विभिन्न नाकाहरूको निरीक्षणलाई तीव्रता दिएका हुन्।
केही दिनअघि पर्सा क्षेत्रका सीमा नाकाको निरीक्षण गरेका गृहमन्त्री गुरुङ शनिबार मोरङ जिल्लाको रङ्गेली नाका पुगेका छन्। उनले त्यहाँ सीमा सुरक्षाको अवस्था, तस्करी नियन्त्रणका प्रयास तथा प्रहरी परिचालनबारे स्थलगत जानकारी लिएको बताइएको छ।
गृहमन्त्री गुरुङले प्रहरी संगठनलाई अझ चुस्त, छरितो र परिणाममुखी बनाउन निर्देशन दिँदै सीमा क्षेत्रमा हुने अवैध गतिविधिमाथि कडाइ गर्न सुरक्षा निकायलाई आग्रह गरेका छन्।
उनको आकस्मिक अनुगमनका कारण स्थानीय प्रशासन र सुरक्षा निकायहरू थप सक्रिय बनेका छन्। खुला सीमाको दुरुपयोग गर्दै हुने तस्करी, राजस्व चुहावट तथा अवैध कारोबार नियन्त्रण गर्न सरकार गम्भीर रहेको सन्देश गृहमन्त्रीको निरन्तरको स्थलगत निरीक्षणले दिएको विश्लेषण गरिएको छ।
सुरक्षा स्रोतका अनुसार गृहमन्त्री गुरुङले आगामी दिनमा अन्य सीमा नाका तथा जिल्ला प्रशासन कार्यालयहरूको समेत अनुगमनलाई निरन्तरता दिने तयारी गरेका छन्।