काठमाडौं । फिफा विश्वकप २०२६ को नकआउट चरणमा फुटबल समर्थकहरूले बहुप्रतीक्षित भिडन्त हेर्न पाउने भएका छन्। साविक विश्व च्याम्पियन अर्जेन्टिना र पहिलो पटक विश्वकप खेलिरहेको केप भर्डे राउन्ड अफ ३२ मा आमनेसामने हुने निश्चित भएको छ।
स्पेनसँगै समूह ‘एच’ बाट उपविजेताका रूपमा नकआउट चरणमा प्रवेश गरेको केप भर्डेले इतिहास रच्दै पहिलो सहभागितामै अन्तिम ३२ मा स्थान बनाएको हो। साउदी अरेबियासँग गोलरहित बराबरी खेलेपछि केप भर्डेले अर्जेन्टिनासँगको भेट पक्का गरेको हो।
उता, लियोनेल मेस्सीको नेतृत्वमा रहेको अर्जेन्टिना समूह चरणमै उत्कृष्ट प्रदर्शन गर्दै उपाधि रक्षा अभियानलाई निरन्तरता दिइरहेको छ। विश्व फुटबलको महाशक्ति अर्जेन्टिनासामु अब प्रतियोगिताको सबैभन्दा ठूलो ‘डार्क हर्स’ मानिएको केप भर्डे चुनौती बनेर उभिएको छ।
केप भर्डे विश्वकपको नकआउट चरणमा पुग्ने सबैभन्दा सानो राष्ट्र बनेको छ। स्पेनसँग बराबरी, उरुग्वेविरुद्ध पुनरागमन गर्दै बराबरी र निर्णायक खेलमा साउदी अरेबियालाई रोक्दै उसले विश्व फुटबलमा आफ्नो छाप छोडेको छ।
अब जुलाई ३ मा हुने राउन्ड अफ ३२ को यस खेलमा अर्जेन्टिनाले आफ्नो अनुभव र स्टार खेलाडीहरूको बलमा जित निकाल्ने लक्ष्य राख्नेछ भने, केप भर्डे अर्को ठूलो उलटफेर गर्दै विश्व फुटबलमा नयाँ इतिहास रच्ने सपना बोकेर मैदान उत्रिनेछ। विश्वभरका फुटबल समर्थकको नजर अहिले यही रोमाञ्चक नकआउट भिडन्तमा केन्द्रित भएको छ।
